Adiviña adiviña!
Son unha banda ben xeitosa
á que lle encanta ler
xúntanse por amor á lectura
un mércores de cada mes.
Sabedes xa que grupo é?
Efectivamente, os Leoríns Leorados, que un mércores mais compartimos tempiño e unha chea de adiviñas que trouxemos da casa. Adiviñas, que son pequenos tesouros recuperados polas nosas familias e que forman parte da nosa tradición oral.
Aínda que o libro que lemos no mes de novembro tiña "100 adiviñas para enredar", na sesión deste mércores os Leoríns Leorados lemos a que trouxemos da casa e os demais tivemos que dar coa solución.
Algunha era ben difícil!
Ademais tamén escribimos as nosas adiviñas para que quedaran recollidas na nosa biblioteca para a posteridade e comezamos a gravar algunha delas na nosa radio coa idea de que toda a xentiña do noso cole as escoite e tente resolvelas.
E para rematar a última xuntanza dos Leoríns Leorados deste 2025 tocaba coñecer que novo libro nos atraparía: Os fantásticos cómics de Ramón D. Veiga protagonizados pola Miñoca máis coñecida do mundo.
Vémonos en xaneiro!
